sinau basa jawa

APRESIASI DRAMA

Mak…!!

Ana Asu Mlebu ngOmah

Dening: Andy Sri Wahyudi

Produksi Kaping Telu

2008-2009

_____________________________________________

Catatan publisher BandarNaskah.blogspot.com:

Mementaskan naskah ini harap menghubungi penulis untuk sekedar pemberitahuan.

Penulis: Andi Sri Wahyudi

Email: andysw80@yahoo.com

Facebook:http://www.facebook.com/ibliz.imut

HP: 085726817576

Lemah Karang Abang

Lin, embuh, pirang abad laku kuping mubeng jagad

Nanging nora bisa krungu gumuyu lan bungahing urip

nganti tekan titi mangsane kabeh wis dadi areng

dadi arerupa wengi lan biru arem.

wektu sing manis, ayu, lan kenes dadi abang mangar;

Dadi watu; dadi awu; dadi asu!

Saiki awake dewe lagi wae menyat saka pangkonane simbah

Arep nggoleki dalan sing jare wis digawe dewa

dalan warnane jambon sing kudu disrateni kanthi gemati

sing kudu dipacaki nganggo laku nalar lan landeping lathi

sakarepmu anggonmu ngonceki

sakarepmu anggonmu ngudak-udak

sakarepmu anggonmu lumaku

merga saka adoh kana, ana wewayangan hanggegirisi

wewayangan sing nyabrang liwat langit suwung

wewayangan sing ora nate dikandakake simbah:

jagad mesin tanpa patrap isin, mutah-mutah mbubrah sawah

nganti tekan titi mangsane jaman nggulung manungsatama

dadi bajingan nasar; dadi gedibaling pasar!

Kae galo delok’en…

Lin, ana asu cacahe sewu ndilati omah nganti leleh

wong-wong padha nglungani wengine, nggoleki srengenge dewe-dewe

saiki mung ana kuburan sing kudu ditresnani ngganggo kringet lan ati.

Ngayogjakarta, April 2009

Lin, ana asu cacahe sewu ndilati omah nganti leleh. wong-wong padha nglungani wengi nggoleki srengenge. saiki ming ana kuburan sing kudu ditresnani ngganggo kringet lan ati.

Kanggo: wong-wong sing tak tresnani

ANA ING KAMPUNG EMBUH. KAMPUNG SING ORA ANA NANG PETA KECAMATAN.

NANG LATAR SING RADA JEMBAR, ANA BOCAH WADON CILIK JENENGE SUMI, LUNGGUH DEWEAN NUNGGU MAKNE MULEH SAKA PASAR. SUMI KETHAP KETHIP, RUPANE KATON NYREMIMIH.

ORA LET SUWE SUMI NYANYI-NYANYI DEWE. NYANYI SAPENAKE UDELE DEWE.

Sumi : Dondong apa salak

Duku cilik-cilik

Ngandong apa mbecak

Mlaku thimik-thimik

Mengko ibu mesti mundhut oleh-oleh

Kacang karo roti

Aku diparingi

Ah males ah…

SUMI MLAYU MBUH LUNGA NANGENDI

SAKA NJERO OMAH, ANA SUARA PATING GLODEK, SUARA BEKAKAS PADA TIBA. ANA SUARA ASU NJEGOG, NGGERENG, LAN GUMUYU CEKEKEKAN. DUMADAKAN NYUSUL SUARANE SURIP, BENGAK-BENGOK MISUH-MISUH DEWE. SURIP MBANYAKI, GEDABIKAN NGOYAK-OYAK MECUTI ASU! NGANGGO PECUT BLEDEK, SENJATA WARISAN LELUHURE!

Surip : Maak!! Ana Asu mlebu ngomah!!! Cia...ttt!!! CTAR…CTER…CTER…CTAR...!

Modar Ndasmu! Kena cengelmu ra kowe! Sabet Cangkemmu!

Asu-asu : Gugukkk gukk gukkk gukkk!! Grrrr!!! Hahaha…Kakakakakakak..!!!

Surip : Minggat!! Asu Njijiki!! Kena cengelmu ra we!

ASUNE MLAYU METU NGOMAH, NANGING ANA ASU SIJI SING ISIH KERI, NGADEK NGGEJEJER MENTHELENGI SURIP. SURIP GAGE MLUNCAT MECUT NDASE ASU.

Surip : Wo…malah mecicil! Tampanana! Ciaaattt…! Modar Cocotmu!

NAGGING LUPUT! SURIP BOLA-BALI MECUTI NANGING TETEP LUPUT, MERGANE ASUNE LUWIH LINCAH, GESIT LAN PINTER ENDA. NGANTI ASU KUWI MAU MLAYU METU OMAH! SURIP NUTUTI ASU METU NGOMAH, MLAYU JRANTHAL NGGAWA PECUT BLEDEK. SURIP NGOYAK NGANTI TEKAN ADOH, NANGING KALAH CEPET KARO PLAYUNE ASU.

***

SUMI NJEDUL DOLANAN ENGLEK MANEH NANG LATAR. COTHOT LIWAT LATARE SURIP AREP LATIHAN SILAT NANG NGISOR WIT RANDU.

SURIP MLAKU KATON KEKESELEN, BANJUR MARANI SUMI SING LAGI DOLANAN ENGKLEK DEWE.

Surip : Sum asune mau bali meneh ra?

Sumi : Aku rangerti e kang? (Sumi lingak-linguk) Kae pa kang Asune?

Surip : Ndi e Sum?

Sumi : Kae lho malah nguya-ngguyu!

Surip : Wo ho’oh e! Pancen truk biangane tenan ok! Bakal tak kemah-kemah tenan kowe Su!

SURIP MLAYU NGOYAK ASU MANEH, NANGING DUMADAKAN ANA SATENGAHING DALAN, SURIP RAISA OBAH. AWAKE NGACENG! KAKU KABEH.

NANG LATAR OMAH PANGGONANE SUMI ENGKLEK.

MAK JIUK, IBUNE SURIP MULIH SAKA BAKULAN NANG PASAR. MARANI SUMI SING LAGI ENGKLEK.

Sumi : Mak ana asu mlebu omah!

Mak Jiuk : Asune sapa? Aneh-aneh! Nduk, Muleh yo! Ki tak gawake oleh-oleh. Kang masmu nangendi je nduk?

Sumi : Mlayu ngoyak asu mak.

Mak Jiuk : Wah jan bocah kok senenge aneh-aneh!

BAKIR LIWAT DANDAN TURUT DALAN, NGANGGO KLAMBI APIK LAN RAPI

Bakir : Ngapa e yu?

Mak Jiuk : Surip ki ngoyak-oyak asu!

Bakir : Seneng ro asu pa yu?

Mak Jiuk : As Mbuh Kir, Surip ki rak cah angel ta? Di parani prawan Ayu malah ditinggal gawe kandang pitik. Disenengi randa sugih ya emoh. Malah ngoyak-oyak asu!

Bakir : Kae ki gek-gek seneng wong Lanang yu?

Mak Jiuk : Racaturan Kir, kae ki piye-piye tetep anakku! Seneng lanang pa wedok tetep tak sayang! (MAK JIUK AMBEGAN SEDELA) Ora, Kowe ki arep nangendi e Kir? Kok le rapi.

Bakir : Nggolek Banci Yu!

Mak Jiuk : Oalah Kir…Bakir! Wong Wedok sa arat-arat ok, malah milih Banci!

Bakir : Ha kowe durung tau ngrasakake kokYU!

Mak Jiuk : Sing dirasake ki apane je Kir? Cah enom aneh? Muleh yo nduk!

MAK JIUK NGGANDENG SUMI MLEBU OMAH

Bakir : Wo… lha wong radong! Hobi e malah dionekke aneh!

BAKIR MLAYU KANTHI SENENG, KAYA OLEH DOLANAN ANYAR.

Bakir :Yoooo… Mbanci yo…! Mbanci mbanci mbanci…mbanci mbanci…MBANCI…YEACHHH!

DUMADAKAN BAKIR MANDEG MERGA WERUH SURIP NGGEJEJER RAISA OBAH. BAKIR KAGET LAN GUMUN WERUH SURIP.

Bakir : Banci pa ya?

SURIP MENENG WAE

Bakir : Kowe ki ngapa e Rip? Kurang gawean!

BAKIR TANSAH PENASARAN, BANJUR NDUMUK AWAKE SURIP

Bakir : Lho Rip?! Awakmu koq isa ngaceng ki piye ta Rip? Kena apa ta kowe ki Rip? Apa aja-aja…? Wo iki mesti kena sawan!

Sik Rip ta goleke uwong ampuh.

BAKIR PEPLAYON NGGOLEK PITULUNGAN.

NANG LIYA NGGON COTHOT LATIHAN SILAT SORE SORE.

***

NANG OMAHE SURIP

Mak Jiuk : Omah koq dadi rakaru-karuan ki piye ta ya?

MAK JIUK TANSAH NGATI-ATI MLEBU OMAH.

Mak Jiuk : Wis, kowe dolanan nang kono disik nduk!

MAK JIUK TANSAH PRIHATIN MARANG KAHANAN OMAHE SING NYALAWADI.

Mak Jiuk : Iki mesti gara-gara Asu sing dioyak-oyak Thole!

MAK JIUK NJUPUKI BEKAKAS SING SUMEBAR NANG MLESTER, mBAKA SIJI-SIJI. SUMI NYANYI NUNGGONI MAKNE.

Sumi : Naik-naik ke puncak gunung tinggi tinggi sekali.

kiri kanan kulihat saja banyak pohon cemara.

kiri kanan ku lihat saja banyak pohon cemara.

LEBAR NJUPUKI BARANG-BARANG SING PATING KECECER MAK JIUK GAGE NGGOLEKI JLUNTRUNGE SURIP.

Mak Jiuk : Wis yo nduk melu Simak!

Sumi : Nengendi Mak?

Mak Jiuk : Nggoleki kang masmu!

MAK JIUK NGGANDENG SUMI METU SAKA OMAH.

NANG NDALAN PETHU’AN KARO BAKIR SING WIS KESEL.

Mak Jiuk : Kowe ki ngapa e Kir? Ngoyak banci pa?

Bakir : Waton! Aku arep nggolek wong ampuh!

Mak Jiuk : Nggo ngapa e?

Bakir : Nggo nulungi Surip!

Mak Jiuk : Surip sapa je

Bakir : Wo..wong radong! Ha ya Surip anakmu!

BAKIR MLAYU NDISIKI MAK JIUK LAN SUMI

Mak Jiuk : Lho? Kir enteni Kir! MAK JIUK NUSUL BAKIR Surip ki kena apa e Kir? Saiki bocahe nangendi?

Bakir : Kena sawan! awake ngaceng kabeh! Kana kowe ngancani wae!

SURIP MLAYU LUWIH CEPET!

Mak Jiuk : Bocahe nangendi e Kir! Wahjan malah meneng wae! Welha Denok mau nangendi yo? MAK JIUK NGGOLEKI SUMI. We…malah engklek meneh! Yo nggoleki kamasmu!

MAK JIUK LAN SUMI LUNGO BLUSUKAN NGGOLEKI SURIP

***

NANG LIYA NGGON BAKIR KETEMU COTHOT

Bakir : Thot Cothot! Surip tulungi Thot! NANGING COTHOT MENENG WAE TETEP LATIHAN SILAT! Thot awake Surip ki ngaceng kabeh! Raisa obah!

Cothot : Kowe nek crewet wae tak antemi lho Kir!

Bakir : Ki tenanan Thot! Cepet Thot tulungi!

Cothot : Saiki Surip nangendi?

Bakir : Nangisor wit Nangka! Yo Thot melu aku Thot!

Cothot : Wis kana kowe ndisik wae!

BAKIR MLAYU BALI MENEH NANGGONE SURIP. COTHOT MLAYU MLUMPAT MLUMPAT UMUK SING ISA SILAT.

Cothot : Houp yak! Houp yak! Ciaaa….ttt!!

NGERTI-NGERTI WIS TEKAN NANGISOR WIT NANGKA

SURIP KAGET WERUH COTHOT SING DUMADAKAN ANA NANGAREPE

Surip : Nge Get geti kwe ki Thot! Iki pokokmen asune kudu kecekel Thot! Nek ra kecekel marai mangkel! Omahku wis diosak-asik e Thot! Dilit kas mesti sing diosak-asik omahmu! Iki sing marai tangga-tanggane awake dewe dha lunga ratau mulih! Saiki ming kari awake dewe sing manggon kene! Asune kudu digoleki bareng-bareng!

BAKIR TEKA

Bakir : Lho wis mari pa Rip? Wis mari tenan ta ki?

Cothot : Uwis Beres!

Bakir : Nggolek banci neh ah…mbanci mbanci…

Surip : He Kir! Sing mbanci kosik. Kowe kudu melu nggoleki Asu!

Bakir : Suk rak kecekel dewe Rip.

Surip : Iki masalah serius Kir! Pokokmen asune kudu kecekel! Nek ra kecekel bakal rakaru-karuan tenan!

MAK JIUK KEBLASUK, UNDANG-UNDANG NGGOLEKI SURIP

Mak Jiuk : Lee…thole…lee…

Bakir : Rip kae rak suarane makmu ta?

Surip : Mak….simak…aku nang kene Mak…

Bakir : Mbok ra bengak-bengok Rip, diparani wae

MAK JIUK LAN SUMI MALAH MBINGUNGI. SURIP MARANI MAKNE

Surip : Mak aku nang kana kae lho…Mak! Karo Bakir ro Cothot. Nyusul ya Mak…ta enteni.

MAK JIUK LAN SUMI MARANI SURIP, COTHOT, LAN BAKIR.

Surip : Wis sak iki dirembug sing tenanan! Mak, Kir, Thot, Sum. Saiki awake dewe kudu dadi siji nggoleki asu bareng-bareng! Piye do siap kabeh ra? Siap ra Mak, Kir, THot?

Kabeh : Siap!!!

Bakir : Kepyakke!

Surip : Yo saiki digoleki bareng-bareng!!

Kabeh : Yo…digoleki yo…!!!

MAK JIUK, SUMI, BAKIR, SURIP LAN CHOTOT BEBARENGAN NGGOLEKI ASU. KABEH PADA NYIAPAKE UBA RAMPE LAN GAMAN: PECUT BLEDEK! Lan SENTER, LAN BLEBET SIRAH BEN KATON WANGUN.

SAPLOK KUWI, KABEH NEK PADHA LUNGA NANDI WAE PECUT BLEDEK MESTI DIGAWA!

Surip : Saiki mlencar dewe-dewe!

KABEH PADA MLENCAR NGGOLEKI ASU, NANGING SUMI WEDI DI TINGGAL MAK JIUK.

Sumi : Mak aku melu mak. Aku wedi je mak.

Mak Jiuk : Yo wis kowe nang kene disik wae. Nunggu aku

SUMI MENENG WAE KETHAP-KETHIP DEWE, BANJUR NYANYI DEWEAN KARO MLAKU-MLAKU.

Sumi : Cicak-cicak di dinding diam-diam di dinding

Datang seekor dinding hap hap lalu di dinding

Mak Jiuk : Lho Sum? Kok tekan kene?

Sumi : Asune wis ketemu Mak?

Mak Jiuk : Durung je nduk…paling asune lagi blanja nang supermarket nduk.

Sumi : Aku tak nyanyi meneh ya mak?

Mak Jiuk : Rasah nduk, ndak asune ngerti. Wis melu simak wae kene.

SUMI BANJUR NGINTHIL NANG MBURINE MAK JIUK

NANG LIYA NGGON BAKIR, COTHOT LAN SURIP ISIH SIBUK NGGOLEKI ASU.

Surip : Piye Asune wis metu durung?

Bakir : Durung je Rip,mmm…nggolek banci wae yo..gelem ra Thot?

Cothot : Kowe nek crewet wae tak tapuki gusimu lho Kir!

Bakir : Kowe kok jahat to Thot?

Surip : Wis ayo nggoleki meneh! Malah ngganyik!

SURIP MLAKU MANEH NYENTERI KEBON LAN NGGON SING PETENG-PETENG LIYANE.

Surip : Asune ki nangendi ta ya…Su…Asu…Ndene su…!

MAK GRAGAP SURIP WERUH ASU GEDHE BANGET LORO CACAHE MARANI DEWEKE!

Surip : Kir…Thot…! Ha kae Asune…Guedhe tenan! Sak Gentho!

NANGING BAKIR LAN COTHOT MENENG WAE ORA SEMAUR APA-APA.

Surip : Kir…Thot…

DUMADAKAN KADI MBURI ANA SUARA ASU NGGERENG-NGGERENG AREP MBRAKOT SURIP!

Surip : Wuoh…bajingakk…Kir…Thot…Mak…Sumi diamanke!!

Mak Jiuk : Ana pa ta Le…?

Surip :Asune wis teka mak…awake dewe dikupeng mak…! Kir…Thot…Kowe nangendi? Ciaaa…ttt…! Ciaaa…tttt!!!

Ctar…!! Ctar…!! Ctar!! Ctar…!!!

Asu-asu : Grrrr…hhh Guk Guk..Guk…Guk…!!! hahahha….kakkkaaa….!!!

SURIP GEDABIKAN NGOBAT-ABITKE PECUTE. DEWEKE KALAP WERUH ASU SING PADA TEKA. NANGING SUMI MALAH SANTAI MLAKU-MLAKU SAK PENAKE DEWE. MAK JIUK MECUTI ASU SING NYEDAKI DEWEKE. BAKIR LAN COTHOT NGILANG RA NGERTI DUNUNGE.

ASUNNE SAMSAYA NDADI, NGOBAL-ABUL KAHANAN. ASUNE METHUKE SUMI.

Sumi : Kowe ki ngapa ta su? Senenge marai!

NANGING ASUNE TETEP NGGERENG-NGERENG

Sumi : Mak!!! Ki lho Asune Nakal!!

SURIP WERUH BANJUR NGLINDUNGI ADHINE.

Surip : Wanine karo cah cilik! Nek wani nyedak neh tak idoni! Woo…ngece! Cuih..cuih..cuih..! Minggat!!!

ASU-ASU KUWI MAU PADA MLAYU NJRANTHAL SAWISE DIIDHONI SURIP. MAK JIUK ISIH NGOYAK-OYAK ASU SING PADHA MLAYU RAKARU-KARUAN.

Surip : Didhoni Mak!! Didhoni Mak!!

KABEH PADA MENGGEH-MENGGEH…SURIP, SUMI LAN MAK JIUK PADHA NGUMPUL DADI SIJI. BAKIR LAN COTHOT MUNCUL KAYA WONG BINGUNG.

Bakir : Piye Rip? Wis aman ta?

Surip : Wo Malengi! Kowe ki mau dha nangendi je?

Bakir : We lha aku mau ki ro Cothot nggebuki Asu nang Mburi omahe Mbah Karto Je! Saiki awake dewe kudu jaga-jaga ki Rip! Nggone mbah Karto diparani asu akeh tenan!

Surip : Yo wis saiki jaga nang cakruk wae Yo! Mak, Sumi dijak mulih wae.

Mak Jiuk : Yo Nduk mulih sik. Sesuk ndak telat le sekolah

Sumi : Aku moh sekolah kok Mak.

Mak Jiuk : We..ben pinter je malah emoh. Lha ngapa to nduk?

Sumi : Ndak dadi Asu!

Mak Jiuk : Ealah… yo wis rasah sekolah wae. Tur ko nek dadi asu bodho pye nduk? Lha cita-citamu ki apa je nduk?

Sumi : Dadi Doraemon mak!

Mak Jiuk : Woalah…wis turu wae yo nduk!

KABEH PADHA TURU NGLINTEK MERGA SAKING KESELE OYAK-OYAKAN KARO ASU

Bakir : Saiki awake dewe jaga Rip?

Surip : Lha iya. Nek asune teka meneh piye jal?

Cothot : Wedi pa Kir?

Bakir : Ora. Wah…mbok tak mbanci sedilit ya Rip..

Surip : Wah jan! Thot, Bakir di gedhek cengelle ben lali, terus gek turu

Cothot : Gampang…ciattt…Diegh!

BAKIR BANJUR KAYA WONG CLELENG, NGGLIYER KAYA WONG MABUK.

Surip : Jenengmu sapa Kir?

Bakir : Samuel Becket!

Surip : (Lega) Haa..wis lali ki Thot! Wis gek turu!

MAK JIUK METU NGELINGAKE SURIP, BAKIR LAN COTHOT

Mak Jiuk : Sesuk Tangine ora awan-awan lho le!

Surip : Wah simak ki crewet wae! Wis aku tak turu disik ko gentenan Thot

KABEH PADA TURU DEWE-DEWE. WENGI KUWI KAHANAN KATON SEPI NYENYET LAN ADEM NJEKUT. ORA ANA LINTANG LAN MBULAN NANG LANGIT SING KLAWU. COTHOT MATANE WIS RA KUWAT PENGIN MEREM. AKHIRE COTHOT MELU TURU. KABEH SING TURU PADHA ANGLER ORA ANA SING GANGGU.

***

WAYAH ESUK

SAK DURUNGE SRENGENGE METHUNGUL BAKIR TANGI DEWE. NGLILIR NGUNDANG JENENGE MBAH KARTO, BANJUR DEWEKE MLAYU NILIKI MBAH KARTO. LEBAR KUWI ANA PAWARTA LELAYU SAKA MEJID AL FALLAH:

Sampun sowan ing ngarsanipun Allah Subhanawataala, Mbah Karta Sandal, kanthi sae. yuswanipun setunggalatus selangkung, jenazah badhe disareaken wonten kuburan Ngrau Permai dinten menika jam kaleh awan.

Surip : Wah senenge mbribeni wong turu! Mbah Karto sandal ki mati kok ya esuk-esuk ta ya...?

Cothot : Sing mati sapa ta Rip?

Surip : Mbah Karto Sandal. Wis turu neh wae yo Thot!

Cothot : Aku ya isih ngantuk je Rip..

COTHOT NJINGKRUNGMENEH KAYA EBI.

Surip : Ya wis mbah, karya slamet, muga-muga mlebu surga mbah. Terus nak wis neng surga rasah nggawe sandal. Ndak ko suargane dadi pasar! Tak turu meneh ya mbah…ko awan tak layat. Ra lunga nangendi-endi lho mbah!

SURIP TURU MENEH

BAKIR MARA MENEH NUTUKE TURUNE. LET SEDELA SRENGENGE METHUNGUL SAKA KULON, KAYA-KAYA NGABARAKE: URIP KUDU TERUS MLAKU ORA OLEH MANDEG NANG TENGAH DALAN. LAN PITIK-PITIK JAGO PADA KLURUK: KUKURUYU…UUUKKK!!!

MAK JIUK WIS TANGI NOMER SIJI, BANJUR GOLEK BANYU GAWE WEDANG. NANGING DEWEKE SEBEL WERUH SURIP, BAKIR LAN COTHOT ISIH TURU.

Mak Jiuk : Wo…lha cah edan! Yah mene je sih micek!

MAK JIUK GAGE NJUPUK BANYU NANG SUMUR KOMPAN. BANJUR…

BYUUURRR!

SURIP, BAKIR LAN CHOTHOT TANGI GUMREGAH LANGSUNG NANTANG KERENGAN!

Surip : Bajiguri! Ngejak senggel aku pa Mak?!

SURIP SIAP-SIAP KAYA PETINJU, NGUBENGI MAKNE, NANGING MAKNE RA GELEM KALAH SIAP-SIAP KERENGAN!!

Surip : Senengane marai rame!

Bakir : Wong tua kurang ajar!

Cothot : Ratau dididik, nek nggugah sing sopan!

Mak Jiuk : Heh! (MARANI CAH TELU) Oalah Cah…Cah…kowe ki mung seka uyuhku we arep nantang aku! Kowe ki kangslupan apa? (IDU NANG TANGAN BANJUR DIRAUPKE RAINE SURIP) Minggat!

Surip : Woh Yiyit-i! Ambune jangan brongkos!

Mak Jiuk : Cepet aku diewangi nyiapke dagangan! Nom-noman lanang ra nyambut gawe. Kowe ki do raisin pa Le? Wis rupane elek! Watake elek! Ra duwe gawean!

Surip : (SURIP RUPANE MBLERET) Mama kok gitu sih sama anaknya?

Mak Jiuk : Mama..mama! matamu! Ayo cepet! Ko awan sithik aku ki arep layat barang.

Surip : (SURIP MLAKU KARO NGGRUNDEL) Karang ya wong tua ra sekolahan. Galake ngluwihi Satpol PP!

Mak Jiuk : We lha omong apa kowe?

Surip : Ora Mak, kowe kemayu tur nggemeske kaya SATPOL PP.

Mak Jiuk : SATPOL PP ki apa e le?

Surip : Walah, kuwi kancane gedang godog. Wis rasah kakean takon! Wis do mulih disik wae. ko ewang-ewang nang sripah.

SUMI TANGI TURU LANGSUNG MLAYU JUPUK KREWENG NGGO GAMBAR GARIS ENGKLEK. KARO NYANYI-NYANYI.

Sumi : Pelangi-pelangi alangkah indahmu

Mereh kuning hijau di langit yang biru

Pelukismu agung siapa gerangan

Pelangi-pelangi ciptaan tuhan

MAK JIUK METU NGGOLEKI SUMI AREP DIKON ADUS

Mak Jiuk : We lha! Nduk kowe ki piye ta? Jare pamit ngising? Malah engklek! Ayo mulih adus! Cepet! Wah malah mbudeg! Bocah kok kandanane angel ta ya?

MAK JIUK GAGE NGGANDENG SUMI KANTHI JENGKEL....

***

NANG NDALAN KAMPUNG

BAKIR LIWAT NGGAWA GENDERA PUTIH LAN GLOGOR NGGO TANDA SRIPAHE MBAH KARTO SANDAL. NANG NGAREP CAKRUK KETEMU COTHOT SING MALAH LATIHAN SILAT.

Bakir : Mbok leren Thot, melu ewang-ewang nang sripah. Cah mbagusi. Mbok wis Thot…nguli wae, pa dadi germo.

Chothot : (MUNTAB) Omong apa? Baleni!

Bakir : Wuoh Nesu e..! ora Thot kowe wangune dadi tentara..

Chothot : Tak templing Ndasmu lho we!!

COTHOT NGANTEMI BAKIR NANGING DITANGKIS NGANGGO GLOGOR, NGANTI GLOGORE MEMBUT-MEMBUT.

Bakir : Thot kowe isa kualat lho Thot. Thot..thot…

Chothot : Ra urusan!

BAKIR MBUBUT GENDERA PUTIH KANGGO SENJATA, BANJUR ULENG-ULENGAN KARO COTHOT NANG TENGAH DALAN.

Mak Jiuk : He! Kowe ki dha ngapa? Ora dha ewang-ewang sripah malah dha homo-homonan nang ndalan! AstafFIRULLOH….ya ampyuu..n..

Bakir : Kowe ki nek omong mbok ra waton yu! Aku ki dudu homo yu!

Cothot : Ha nek aku Homo tenanan yu!

Mak Jiuk : Walah….nom-noman dho radong! Marai mumet! Wis tak layat sik!

MAK JIUK BANJUR LUNGA NGLETER NINGGAL COTHOT LAN BAKIR

Surip : Simakku mau wis menyang nang omahe mbah Karto durung je?

Bakir : Wis kawit mau Rip. Kene ki ngenteni kowe je.

Surip : Ya yo ndana bareng wae yo!

Cothot : Yoo yo yo…!

Bakir : Sik aku tak masang Gendera ro glogor nang prapatan disik!

Cothot : Gendera masang gendera!

SUMI NGERTI-NGERTI TEKA

Sumi : Kang, aku melu! aku ra duwe kanca je. Wedi nek asune teka meneh!

Surip : Yo…tak tusulke simak, tur nek nang sripah ra rewel lho Sum!

CHOTHOT, SURIP, LAN SUMI MLAKU LAYAT NANGOMAHE MBAH KARTO SANDAL. BAKIR MLAYU MASANG GENDERA RO GLOGOR NANG PRAPATAN.

KURSI-KURSI WIS TUMATA ANA LATARE MBAH KARTO. BAKIR, COTHOT, SURIP, SUMI LAN MAK JIUK LINGGUH JEJER SADERETAN KURSI. ORA ANA SUARA WONG NGAJI MERGA CASSETTE RUSAK!

Bakir : Mbah Karto ki umure kok isa dawa banget ya?

Surip : Kuwi rak merga jaman nom-nomane kerep laku prihatin Kir.

Bakir : Prihatin piye? Teneh uripe penak tur sugih. Mosok kit enom tekan tua prehatin terus. Nganti tekan mati gawe sandal terus.

Surip : Wo…wong radong! Prehatin ki lakune wong jaman biyen, kuwi dinggo anak putune! Karo nggo nglatih rasa lan raga. Ben uripe tentrem, ati lan awake kepenak. Kuwi sing marai umure dawa. Dadi sing digolekki ora sugihe dewe!

Mak Jiuk : Nek omong cangkeme rasanter santer. Neng layatan ngisin-isinke!

Surip : Ben ming wong lima we!

Bakir : Laku prehatin ki piye ta?

Surip : Werna-werna, ana sing pasa mutih, ngrowot, nganyep, lampah pendhak jum’at kliwon, melek bengi, kungkum. Ngerti ra? Nyilih genine Thot.

Cothot : (Rogoh-rogoh sak) Nyo!

Bakir : Kurang gawean! Nek urip 125 tahun ming kon rekasa terus ya gah. Kana prehatino dewe sak modare!

Surip : Wo…Cah mbejujak! Urip nek kulina mbajing ya kaya ngono kuwi!

Kowe rak ya ngerti dewe ta? anak-anake mbah Karto semubar ana sing tekan Argentina, Alaska, Pak Jauri malah nang eropah.

Bakir : Ass Prek ra caturan! Nyatane singurusi apa-apane rak ya awake dewe ta?

PRANATA ADICARA SRIPAH WIS MULAI NGOMONG PRATANDHA JENAZAH WIS AREP DIANGKAT MENYANG KUBURAN.

PRANATA ADICARA : …..Kagem para nem-nemean dipun aturi ngrewangi!

Mak Jiuk : Kae! kana wis arep disareke kae! Nom-noman ra tanja! Yo aku melu!

BAKIR, SURIP, COTHOT LAN MAK JIUK GAGE NGUSUNG LAYONE MBAH KARTO. NANGING DUMADAKAN SURIP RA KUAT, MERGANE SING DIUSUNG KIJING.

Surip : Kir..kir…kir…sik delehke disik..delehke disik...!

Bakir : Kowe ki piye ta Rip? Nangarep dewe je malah sembrono!

KIJINGE DI SELEHKE NANG LEMAH!

Surip : Matamu wi! Keju je! Pegel! Kir karebmu ki piye ta? Mbah Karto melu dicor neng njero kijing ki?

Bakir : Salahe ra ana sing dijak rembugan! Aku ki mumed Rip! Apa-apa mung dipsrahke aku kabeh.

Surip : Tur carane ya ra ngene ki Kir!

Bakir : Karepku ki ya ben efektip! Isa dipindah nagendi-ndi mbok menawa ana gusuran kuburan.

Surip : Wong edan! Senenge Nyalai aturan! Saake mbah Karto. Sumuk!

Mak Jiuk : Kowe ki ya ming omong wae kok le! Kawit mau esuk sing temandang gawe ki ya ming Bakir!

Bakir : Hai ya! Seka sing ngonangi matine, aku, ngumumke nang mejid, aku, masang gendera ro glogor aku! Sing nyewa pranata adicara yo aku! Golek tukang photo yo aku.

Chotot : Sing mateni sapa Kir?

Bakir : As Prek! Sing layat ming wong lima we ribut! Kana sing nang Argentina, Alaska ro Eropa kon ndene!

Surip : Ha tur nek kaya ngene ki rak ya ra beradab ta Kir? Nek anak-anakke do teka rak ya ngisin-isini ta!

Bakir : Beradab Gandhu! Wong anak putune we dho ra tau nggatekke wong tuwane kok! Ra tau ditiliki. Sing njaga rak ya ming awake dewe ta Rip?

Mak Jiuk : Wah jan dho crewet wae!

Cothot : Iki sida digawa nang kuburan ra e?

Surip : Nek rasah digawa nang kuburan we piye ta?

Bakir : Ra papa Rip. Didadekke prasasti wae nang tengah-tengah kampung!

Sengara ilang! Tur ya dirawat, di semprot parfum, ben wangi terus. Kuwi kijinge berkwalitas. Fungsine kaya pyramid mesir!

Cothot : Sing pesen nangendi e Kir?

Bakir : Wo..lha ki lho…mbok diwaca: PT siksa kubur! Direkture malaikat Jibril!

Surip : Sak domen aku ki tresna tenan je karo mbah Karto ki. Aku ra lila je nek dikubur trus ming dipangan cacing. Eman-eman. Mah karto ki termasuk wong elok je. Wis ra ana neh wong kaya mbah Karto.Gusti allah wis kente’an stock!

Bakir : Ora ming kowe Rip. Aku ki sayang tenan, mbendina ta tiliki, ta pijeti, ta tukoke sarapan jenang. Nek ra ana sing gelem ngrawat kijinge tak deleh kamarku yo rapapa kok Rip.

Mak Jiuk : Hai ya! Sing marai awake dewe manggon neng kene ki ya mbah Karto. Wong paling pisanan. Wong sing marai awake dewe kuat urip. sing gaweane nyritani sujarah lan menehi wewarah. Ben awake dewe isa duwe pikiran dewe kanggo modal urip. Wong sing salawase urip mung dingo berjuang ki yo mbah Karto kae!

Bakir : Mbok wis yu rasah nggambleh gang perjuangan! Aku ki mumed nek krungu perjuangan ki. Marai frustasi!

Mak Jiuk : Kir! Kawit jaman kerajaan, jaman londo, jepang, nganti tekan saiki. mbah Karto ki obah terus nganti anak putune dadi kabeh! Deweke ya ra lara ati nek dilaleke. Kae ki mikir ora nggo awake dewe tur dinggo generasine.

Bakir : Kaya ngerti-ngertia perasaane mbah Karto Yu!

Mak Jiuk : Wo..lha cah aneh! Generasine mbah Karto ki ra kaya kowe ngono kui. Senenge mung Mbanci terus!

Surip : Yo ra ngono kui Mak..terus generasine Mbah Karto ki sing kaya ngapa? Sing wis sukses, isa nggayuh ngimpine, sing dho lali karo omahe dewe? sing duwe duit akeh? Aku ki tenane ngerti mak nek mbah Karto ki wis pepak uripe. Tau dadi tentara, kuli, guru, juragan batik, wartawan, bakul donat, ketua partai lan sapinunggalane. keri dewe tukang gawe sandal! Tur saiki ki mbah Karto ki manut awake dewe. Manut sing isih urip. Pesene Mbah Karto ki mung siji: Wani urip lan dadi awakmu dewe! ra ming cangkeman!

Bakir : Kaya kowe ta Rip?! Kakean cangkem!

Surip : Asui! Wis yo gek diangkat!

PARA TAKZIAH SING MUNG WONG LIMA KUWI MAU PADHA MLAKU BEBARENGAN NGUSUNG KIJING.SUMI NYEBAR SAWUR, MLAKU IRING-IRINGAN TUMUJU TENGAH KAMPUNG. NANGING NANG TENGAH DALAN ANA ASU-ASU SING NGADANG LAYATAN. KABEH PADA KAGET WERUH ASU SING AKEHE SA BRAYAT! ASU-ASU KUWI MAU PADHA PATING JEGOG!

Surip : Mandeg kabeh!!!

Mak Jiuk : Ngapa ta le? Asune ki diuja wae. wis yo mlaku meneh.

Bakir : Ho oh Rip ko malah GR

Cothot : Mbok ditakoni disik wae Rip. Karepe apa?

Mak Jiuk : Nek arep melu layat barang rak ya rapapa ta?

Surip : Sik tak takonane…

Sumi : (Nyela) Aku tak pipis disik ya Mak…

Mak Jiuk : Kana gek cepet mlayu!

SUMI MLAYU GOLEK NGGON NGGO PIPIS.

Surip : He..Asu asu lan asu…karepmu ki tenane apa ta? Senenge ngisruh uripe wong!

Asu : Aku mrene mung arep layat mungsuhku sing marai aku dadi asu. Mungsuh sing tak ajeni!

Mak Jiuk : Lho? Kok isa marai dadi asu?

Asu : Mergane biyen gek jaman Landa aku diipat-ipat dadi Asu! Taakoni, Karto kuwi pancen wong ampuh tenan. Nanging aku tetep ratrima!

Bakir : Ora, kowe kuwi su! kok isa diipat-ipat ki ngapa?

Asu : Mergane aku biyen dadi begundale Landa sing arep ngrebut lemahe Karto! Nanging Karto ra manut, malah nantang kerengan. Deweke di goleki Landa pirang-pirang ora kecekel. Jebulane malik dadi kucing kembang telon..

Surip : Kok ngerti nek Mbah Karto dadi kucing mbang talon seka ndi?

Asu : Aku sing ngandani si Soleh adhine Karto dewe, sing matine dirubung semut. Banjur saben kucing mbang talon tak pateni, nganti ana salah sijining kucing sing ta tembak rapapa. Kucing mau malah mancal raiku, ora lidok, kucing kuwi mau malik si Karto. Deweke nesu tenanan, aku diajar nganti babak bundas. Aku diipat-ipat: Yo Wiryo dina iki kowe tak sepatani dadi Asu! Nganti tekan sak anak putumu! Merga watakmu kaya ASU! Nganti tekan seprene aku dadi ASU sak anak turunku. Aku ora trima! Mataun taun aku golek cara lan kekuatan kanggo nyingkirke Karto. Sak iki wis titi wancine!

Surip : Kowe kok isa duwe prajurit akeh ki anak putumu kabeh pa?

Asu : Dudu! Saklonge wong-wong kampung sing tak cokot terus dadi asu!

Surip : Wooo… jebulane tanggane awake dewe dadi asu! Mulakno kok ora tau dha mulih! Eh, Su! tanggaku isa bali dadi menungsa neh ra Su?

Asu : Wis ora isa, merga wis tak cokot!

Bakir : Kowe ki cen asu tenan kok su! Klakon tak kemah-kemah tenan kowe Su! Ciaaatttt!!!

BAKIR NESU-NESU MUNTAB RAKARU-KARUAN!! DEWEKE AREP NGOSAK-ASIK ASU SAK PRAJURIT-PRAJURITE!! NANGING COTHOT LAN SURIP GAGE SING NGGONDELI BAKIR SING MEH KALAP!

Surip : Kir..Kir wis Kir..Thot Bakir Gocekki Thot!

Mak Jiuk : Kir saiki ki wayahe layat ora kerah ro asu!

Surip : Sabar disik Kir..mengko ana wayahe Kir!

Bakir : Nek ra digoceki ta entekke tenan kowe Su!

Asu : Aku ra wedi ye…!!

Bakir : Malah ngece!

Surip : Kir! Nengke wae Kir! (omong ro asu) Su…nek kowe sak prajuritmu ndene ming arep layat tenan. Kana ngetutke nang mburi! Ora ngisruh!!

SAWISE PARA ASU BARIS TUMATA MELU LAYAT MBAH KARTO. KABEH MLAKU IRIT-IRITAN TUMUJU TENGAH KAMPUNG.

Surip : Wis, saiki wis tekan. Delehke kene wae ben isa disawang saben dina.

KIJINGE MBAH KARTO DIDELEHKE TENGAH KAMPUNG. DADI PRASASTI WONG SING PISANAN MANGGON NANG KAMPUNG. SAK BANJURE SURIP NGANDANI PARA ASU.

Surip : He para Asu…Mbah Karto ora disarekake nang kuburan naging didelehke nang tengah kampung. Didadekake Prasasti, dadi saiki acarane wis rampung tekan kene wae. rasah didongakake kowe rak ya raisa ndonga ta Su? Wis kana da mulih neh!

Bakir : Gek dha muleh malah meneng wae!

ASU-ASU MAU MULAI ANA SING NGGERENG LAN NJEGOG! KABEH PADA EMOH LUNGA. NGANTI SURIP, COTHOT, LAN BAKIR MANGKEL DEWE.

Surip : Heh! Su! Karebmu ki apa ta? Saiki acarane wis rampung! Gelem dha muleh ora!?

Asu : Gukgukguk…grrrr…! Aku wegah! kowe sing lunga seka kene!

Bakir : Tenan ta Rip!? Kudune cen disikat mau-mau kok ngeyel!

Surip : Asu licik!

Mak Jiuk : Cen kudu dilawan iki le!

Cothot : Sikat wae Rip!!!

Surip : (Matane mentheleng lan ambegane nggos-ngosan) ASU JULIG! LICIK! NJIJIKI! SIKAAATTTT!!!!

CIAAAATTTT…..CTAR…CTAR…CTAR!! CTAR..!! CTAR!! CTAR…!

MAK JIUK, COTHOT, BAKIR, LAN SURIP WIS KALAP! KERENGAN KARO PARA ASU! KABEH TENAGANE DINGGO KERAH! KABEH GOLEK SENJATA DEWE-DEWE. APA WAE SING ANA DIJUPUK KANGGO NGLAWAN ASU-ASU! MAK JIUK NYAWATI WATU, COTHOT NGGEBUKI NGANGGO TONGKAT, BAKIR TANGAN KOSONG, SURIP NGGAWA PESO PAWON. KAHANAN DADI HOREG NGANTI TEKAN SURUP. NGANTI ASU-ASU SING CACAHE ATUSAN MAU PADA LUNGA KABEH. LUNGA ORA NGERTI JLUNTRUNGE…

CIAAAATTTT…..CTAR…CTAR…CTAR!! CTAR..!! CTAR!! CTAR…!

KABEH PADHA MENGGEH-MENGGEH KEKESELEN, NANGING TETEP PADA MLAYU NGOYAK ASU, NGANTI ASUNE WIS ORA KETOK MENEH. NGANTI KABEH WIS PADHA ORA KUWAT MLAYU. NGANTI WAYAH WIS SURUP LAN KAHANAN TAMBAH SEPI NYENYET. KABEH PADA MULEH NANGOMAHE DEWE-DEWE. MING KIJING SIJI SING KATON ISIH SEGER. KIJING SING DADI PEPESTEN NEK NENG KAMPUNG KUWI WIS TAU ANA WONG URIP JENENGE MBAH KARTO. UWONG SING ORA TAU MANDEG ANGGONE TEMANDANG GAWE, NGANTI TEKAN PATINE. MBAH KARTO. DUDU ASU!

ANA SUARA KLENENGAN. SUARANE KAYA-KAYA AREP TEKA KAHANAN URIP SING ANYAR.

***

SESASI SAWISE MBAH KARTO SEDA, KAHANAN KAMPUNG IKU MLAKU KAYA ADAT SABENE. KAMPUNG SING MANGGON MING KARI WONG LIMA. KAMPUNG SING ORA TAU ANA NANG PETA KECAMATAN! KAMPUNG EMBUH!

SUMI METU NYANYI-NYANYI KARO NGGAWA LODHONG ISI IWAK MATI.

Sumi : Satu satu aku sayang ibu

Dua-dua juga sayang ayah

Tiga tiga sayang adhik kakak

Satu dua tiga sayang semuanya

Ah, engklek ah….

BANJUR SUMI NJUPUK KREWENG NGGAMBAR GARIS KANGGO DOLANAN ENGKLEK NANGING ORA TEKAN RAMPUNG. SUMI NGERTI-NGERTI NGALAMUN, OMONG KARO KREWENG.

Sumi : Kreweng kreweng… kowe duwe bapak ibuk apa ora? Weng-kreweng omahmu ki endi ta? Terus cita-citamu apa weng? Kowe kok isa tekan kene numpak apa weng? Weng, kowe dadi kancaku gelem ra w eng? Mengko awake dewe dolanan engklek bareng…aku wis ra duwe kanca je weng, aku sedih. ki lho..Siwi kancaku siji-sijene wis mati. Gelem ra weng dadi kancaku?

LET SEDELA MAK JIUK METU NGRESIKI LAN NGLEMPITI GODHONG GEDANG.

Mak Jiuk : Kowe ki ngapa enduk kok omong dewe?

Sumi : Eh Simak ta…aku ki pengin duwe kanca je mak

Mak Jiuk : Lha kowe ki yo aneh kok, kon sekolah yo moh..

Sumi : Aku wis isa maca nulis kok mak. Aku ki tenane mesake Simak ro kang Surip je nek sabendina ngeterke aku sekolah. mbok aku tukoke pit tak nggo mangkat sekolah dewe mak..

Mak Jiuk : Yo sesuk nduk..nek ana rejeki ta tukoke pit. Tenane simak ki rapapa kok ngeterke kowe sekolah.

Sumi : Aku ki wis kelas enem mak, pengin ajar mandiri je Mak..mangket sekolah sisan pit-pitan ro kanca-kanca mak.

Mak Jiuk : Wo…lha ya wis…simak ya melu seneng. Pancen seneng je nduk nek isa dolanan ro kanca-kancane ki..

SURIP TEKA NUMPAK PIT MINI, DEWEKE TANSAH KAYA WONG STRES

Surip : Mak iki aku tuku pit rega nyeket ewu nggo sekolah Sumi.

Mak Jiuk : We lha…ki Sum, ditukoke pit mini ro kangmasmu…

Surip : Nyo Sum, pit-e nggo sekolah. kowe seneng ra Sum..kowe ki ngapa kok sedih?

Sumi : Siwi, Iwakku mati je kang…

Surip : Kowe ki pethuk kok Sum..nek dileboke banyu yo raisa ambegan!

Sumi : Kowe ki piye ta kang?

Surip : Wis iwake gek dikubur, nyo pit e nggo pit-pitan!

Sumi : Wah turnuwun ya kang…

SUMI LANGSUNG NYAUT PIT E DINGGO PIT-PITAN MUBENG-MUBENG KAMPUNG.

Mak Jiuk : Kowe kok ndidit le?

Surip : Aku kerja nang kerajinan Mak, nang kutha! Direkture jenenge Kelik Barjo. Bojone londo Australi, ayu mak. Tur juraganku ki kaya wong stress, hobine dolanan wong wedok nakal. Tenane uripe kesepian, wis kente’ an acara. terus senenge curhat ro aku.

Mak Jiuk : Simak melu seneng le…

Surip : Suk tak salamke ro pak Kelik Barjo pa? sapa ngerti cocok ro kowe Mak..

Mak Jiuk : Cah Edan! Nek ra ngelingi kowe ro Sumi wis tak tinggal golek lanangan wingi-wingi Rip!

Surip : (Mlaku ngadoh, golek nggon nggo nendang-nendang ro ngantemi angin) Gojek kok Mak..

Mak Jiuk : Saplok Bapakmu minggat ki. Kasih sayangku rak ming nggo kowe ro Sumi ta? Kowe gelem duwe bapak tiri pa?

Surip : Walah..ho..oh..mak..! aku ngerti nek kasih sayangmu ki luwih-luwih! (dremimil) simak ki sok-sok’an, nek pengin jatuh cinta neh ki tenane aku ya rapapa.

Mak Jiuk : (mbalang sandal) cah lanang senenge Ndremimil, njijiki!

Surip : (kaget) Duoh! Simaki galak tenan! Ra ngerti wong lagi stress!

MAK JIUK MING MENJAP-MENJEP. SURIP MBALEKE SANDAL SISAN. NJUPUK GITAR SING GUMLETAK NANG CEDHAKE MAK NE, BANJUR SURIP NYANYI-NYANYI DEWE RA ANA NADANE.

Surip : Nang njeron bis kutha aku ketemu marang wanita…

endah pasuryane, grapyak wicarane,

dawa rambute, kuning langsat pakulitane.

Sawijing dina aku lunga menyang ngomahe

Ati selak ngebet pikiran wis mumed

Mbasan tekan kana jebulane wis ana priya liya nang jejere.

Awakku lemes lempe-lempe kaya gatutkaca ilang kapite.

Tiba mlumah kepleset pace. Oh..kere..!

Oallah…Wedos wedhos..!

cah wedok-wedok ki cen marai mumed tenan!

BAKIR TEKA KARO SINGSOT-SINGSOT, TERUS MESEM WERUH MAK JIUK.

Bakir : Piye kabare yu? Aman ta? Asune wis ra bakal bali meneh Yu!

Mak Jiuk : Aman Kir...wis sesasi asune ra ngetok!

Bakir : Saben pojok kampung ki wis tak sebari uyah. Sengara ana asu pa Iblis sing isa mlebu yu! Sing penting uripe awke dewe tentrem!

Mak Jiuk : Ha ya urip nek ra sanding Asu gudiken ki yo aman! Kowe Arep mbanci pa Kir?

Bakir : mbok ra ngisin-ngisinke yu…Ora yu, arep golek gawaean anyar. Pasaran manuk lagi sepi je. (noleh nanggone Surip) Yu, anakmu sing bagus dewe ki lagi ngapa ta?

Mak Jiuk : Ass..mbuh Kir! Kit mau nyanyi-nyanyi dewe. ketoke lagi patah hati!

BAKIR MARANI SURIP SING LAGI STRES.

Bakir : Ngapa e Rip? Ketoke kok nganeh-anehi. Lagi wuyung pa?

SURIP MENENG SEMU-SEMU MANGKEL KRUNGU SUARANE BAKIR SAJAK NGECE. SURIP NGAMBU-NGAMBU KLAMBINE BAKIR SING ANEH GANDANE NING IRUNGE SURIP.

Surip : Buajiguri…ambune kaya Lonthe Arab! Kowe nganggo parfum pa Kir? Merk-ke apa e Kir?

Bakir : Wo…lha iki sing marai gratis nek mbanci je. Kowe ki patah hati pa Rip? Ra sembada sing kemaki! Ming loro ati we njuk stress!

Surip : Kowe ki cen radong perasaan kok Kir! Rangerti artine Cinta! The meaning of love!

Bakir : Hahahahaha…jaman saiki kok isih liwat jalur cinta! Uripe we ra jelas kok mikir Cinta barang. Cinta ki kudu duwe visi misi lan materi! Ngerti ra?

Surip : Cinta ki dudu program je Kir! Padake Organisasi! Cinta ki Endah, jujur, tulus, isa nampa apa anane…

Bakir : Wo lha wong radong! Bolabali nek generasi putri Cinderella!

Mak Jiuk : Kowe kuwi Kir. Ngandani thole ki wis siap omah-omah pa?

Bakir : Reka-reka yu..! jajan we penak!

Mak Jiuk : Cah rangenah! Le! aja tiru-tiru Bakir! Lha kowe ki tenane piye je karo Lilis, Tutik, Tuning, terus sapa kae sing rupane kaya camcao? Pramesti? Kowe ki ya aneh senengi gonta-ganti pacar!

Surip : Sing gonta-ganti pacar ki ya sapa Mak? Aku ki tenane yo setia mak. Nek dha ditinggal lunga?! Nek pertama ki dha seneng aku mak, mbasan let suwe terus dha lunga dewe-dewe. Alasane werna-werna. Ana sing wong tuane ra setuju, ra duwe gawean tetep, sing marai bingung ki alasane ilfil! Mbuh artine apa kui mak?

Mak Jiuk : Ha kelakuamu ki ya Njijiki, trus Liar lan Kampungan!. Tur gayane beradab!

Bakir : Wis ta…kandani kok ngeyel...mbajing wae…puenak Rip! Penak! Percaya lenga ula ra percaya minggat ta!

Surip : Prek kir!

Mak Jiuk : Wis tak mlebu wae! ngrasake cah saiki marai teren!

COTHOT METU NGGAWA GENDHENG TUMPUK LIMA, LATIHAN SILAT NGARATI GENDENG! MAK JIUK MLEBU OMAH NGGAWA GODHONG GEDHANGE. SUMI TEKA NYETANDARKE PIT TERUS MLEBU OMAH.

Sumi : Mak aku ngelak mak!!

BAKIR LAN SURIP NDELENGKE CHOTHOT SING LAGI LATIHAN SILAT. SAJAK GUMUN WERUH COTHOT SING RADA EMOSI ORA KAYA ADATE SING TENANG.

Surip : Kir kae Cothot kae kemakine ra ilok-ilok!

Bakir : Thot! Nek wani dadimanten! Ra ming ngarat gendheng!

COTHOT MANDEG SING NGARAT GENDHENG, MARANI BAKIR TANSAH MANGKEL.

Cothot : Omong apa kowe Kir? Njaluk ta idak-idak pa?

Surip : Wis Thot..wis Thot..!

Bakir : Rasah dipisah Rip! Ben tak tandangane.

KAHANAN DADI RAME. MAK JIUK LAN SUMI METU OMAH

Mak Jiuk : Ki pye ta malah kerah dewe? Le! Jare Sumi Asune teka Meneh!

Sumi : Ho oh kang, irit-iritan akeh buangeti!

SURIP, BAKIR LAN COTHOT MANDEG SING RAME-RAME. CAH TELU LANSUNG GAGE MLAYU NILIKI ASU SING IRIT-IRITAN TUMUJU KAMPUNG.

Surip : Yo tilike disik sepira kekuatane!

Mak Jiuk : Sum kowe nang kene disik rasah lunga-lunga!

Sumi : Ho oh mak..atai-ati mak…

KABEH PADHA LUNGA NILIKI ASU. SUMI IJEN KETHAP-KETHIP BINGUNG APA SING AREP DILAKONI. SUMI MBINGUNGI DEWE NAGING DEWEKE MING PLORAK-PLOROK. RUPANE KATON NYREMIMIH NGEJAK OM0ONG-OMONGAN KARO KREWENG.

Sumi : Aku wegah nyanyi…(gedhek-gedek)

Kreweng : Ha ngapa?

Sumi : Pokokmen wegah…

Kreweng : Mbok nyanyi to…

Sumi : Wegah..aku wegah nyanyi ok..

Kreweng : Ayo to..nyanyi to…

Sumi : (kembik-kembik dewe) wegah…aku wegah ok pokokmen wegah…

LET SEDELA MAK JIUK, SURIP, COTHOT, LAN BAKIR BALI MENEH, NANGING RUPANE SAJAK KAYA KAWATIR.

Surip : Wuohh…! Nek kae akeh tenan ewon cacahe!

Bakir : Awake dewe kudu piye ki Rip…?

Mak Jiuk : Kok isa bali meneh ki piye ta Thot? Jare wis tok betengi nggo ilmu Lembu sekilo?

Cothot : Aku ya ra ngerti je yu? Kok isa piye ya?

Surip : Aku bingung tenan ki? Betenge Surip wis ra mandi! (SURIP KAYA CUBRIYA) gek-gek salah sijine seka awke dewe ana sing berkhianat ki? Apa gek-gek ana telik sandi sing nguping? Piye kit hot? Soale singerti japa mantrane ming kowe!

Cothot : Kowe nuduh aku pa Rip? Mbok wani sumpah ditabrak laler!

Bakir : Saiki sapa meneh?

Cothot : Gek-gek kowe dewe Kir? Barangmu anyar-anyar ki mesti disogok duit ro Asune?

Bakir : Nek omong mbok ra waton Thot! Bajiguri!

BAKIR MAJU NGEJAK KERENGAN COTHOT. SURIP GAGE LE MISAH

Mak Jiuk : Uwis! Uwis! Malah kerengan dewe-dewe! awake dewe ki saiki kudu piye?

Bakir : Nggo mboktekake sapa sing marai asune bli meneh saiki banyu kendine di jupuk neng cedhak kijing embah Karto! Nek ana sing mbalela, bakal dadi asu gudiken bar ngombe banyune!

Chothot : Hai yah! Aku ra wedi! (Mlayu njupuk banyu, terus bali meneh)

Surip : Iki ra merga piye-piye, tur ben kabeh ketok cetha! Yo diombe mbaka siji yo…!!!

BANYU KENDINE DIUBENGKE, KABEH PADHA NGOMBE BANYU KENDI SIJI-SIJI. SAWISE NGOMBE KABEH PADHA MENENG WAE! CHOTHOT NGERTI-NGERTI AWAKE NGOLET-NGOLET.

Bakir : Rip..Rip tenan ta Rip! Ra lidok silit kodok! Sing mbalela ki Cothot!

Chothot : (BIASA MENEH) Ye.. tak apusi.

Bakir : Wo…Malengi!

Surip : Hehe… kowe ki nek rumangsa bener njuk semena-mena!

Bakir : Ya ra ngono Rip…kwe ki cen maling ok Thot! Marai isin!

Cothot : Hehehe…

NGERTI-NGERTI BAKIR MBANYAKI DEWE CEKEKERAN KAYA WONG AYAN! POLAH TINGKAHE RAKARU-KARUAN.

Surip : Kir..kir..kir..!!

BAKIR NGGERENG-NGGERENG…

Sumi : Mak! Kang Bakir kena pa je?

Mak Jiuk : Wis meneng wae nduk. Engklek wae kana!

Chotot : Ha ya Ngeneki Rip si penyebar fitnah. Akhire dadi asu!

BAKIR SING AREP DADI ASU NYEDAKI COTHOT KAYA AREP MBRAKOT. JEBUL ORA.

Bakir : Kowe ki ngapa Thot? ye kowe ya taapusi…sing dadi asui sapa?

Mak Jiuk : Malah dha gojek. Asune wis cedhak ngerti ra?

DUMADAKAN SUARA ASU-ASU SING PADHA NJEGOG WIS KRUNGU SAMSAYA CEDHAK.

Surip : Wis saiki awake dewe kudu dadi siji maneh ben ora kontrang-kantring! Iki cen kudu kerengan tenan! Wis dha siap-siap wae!

KABEH PADHA NYIAPKE SENJATA KANGGO KERENGAN! BAJUR KUWI PADHA NGINDHIK ASUNE WIS TEKAN NGENDI.

Bakir : Kae Rip…! Limang menit kas wis dha tekan kene. Aku wis raurusan Rip! Apa wae tak lakoni angger Asune dha minggat seka kampung kene!

Surip : Wis siap kabeh?

Sumi : Aku piye mak? Tak engklek wae yo mak…

Mak Jiuk : Kana engklek nang njero omah wae kana!

Sumi : Ho oh mak…

SUARA-SUARA ASU WIS SAMSAYA NYEDAK, JEGOGANE KETARA BANGET. JEGOGAN ASU SING LICIK, JULIK LAN NJIJIKI!

Surip : (NGITUNG, LAN CANCUT TALI WANDA) 1 2 3 . SIKAT….!!!

Ciatt..ttt! dibetengi sing kuat! Aja nganti ucul Mak…!!!

KABEH PADA KERENGAN MUNGSUH ASU SING EWON CACAHE! NGANTI AWAKE PADHA LEMES KABEH. PADHA NDLEMING DEWE-DEWE RA KARU-KARUAN. NAGGING ASUNE ISIH TETEP TERUS NJEGOGe, RA MANDEG-MANDEG! BAKIR RO COTHOT MLAKU-MLAKU RO NGGUYA-NGGUYU DEWE. NYUARA SAPENAKE DEWE.

KABEH WIS PADHA LEMES, RAKUWAWA NGADEPI KAHANAN SENG NGANEH-ANEHI.KAHANANE WIS DUDU KAHANAN WONG WARAS. KABEH PADHA NDLEMING RA ANA JLUNTRUNGANE.KABEH WIS ORA ELING. KABEH PADA DLEMING. KABEH WIS ORA KUWAWA NGEDEPI ASU-ASU! NANGING SATENANE KABEH ISIH KEPINGIN URIP WARAS!